السلام عليكم
كالعادة إتأخرنا عليكوا بس علشان أوحشكوا شوية يعني و اعرف غلاوتي عندكوا و زي ما توقعت محدش سأل خالص فين البوست بتاع إرتجاع المريء 😂 .
و زي ما تعودنا دايما بنحب التفاصيل عشان كلنا نفهم هنبدأ الأول ب " يعني ايه مريء أصلا 😊 .
واحد يقوللي استنى بس يا دكترة مش للدرجادي احنا متعملين بردو مش بصمجية
معلش استحملني يا سيد - عبد العاطي فنفسك - بس أنا اللي بصمجي بس أنا بحب الناس تفهم
المريء ده أنبوب طوله حوالي 25 سم وظيفته الأساسية نقل الطعام من فم حضرتك لمعدة حضرتك بطريقة آمنة يعني من غير ما يخرج برة و يروح على الرئة مثلا أو القلب أو أي حتة مش لطيفة
و علشان كل ميسر لما خلق له ربنا جعل الأنبوبة دي فيها أعصاب و عضلات بتتسبب في حركة الأكل في اتجاه واحد بس من البلعوم إلى المعدة و ليس العكس أبدا بحركة إعجازية لو عرفنا طريقتها - اللي انت أكيد عارفها يا عبعاطي فانا مش هشرحها 😂 - و ربنا حط في نقطة التقاء المريء بالمعدة دي صمام بيبقى مقفول طول الوقت و مبيفتحش غير لما يحس بالأكل نازل من الفم و البلعوم الى المعدة علشان يعدي الأكل و بعدين يقفل تاني - سبحان الله -
طب ليه ربنا سبحانه و تعالى عامله بالدقة دي كلها ؟؟!
علشان فيه فرق كبير ما بين درجة حموضة المعدة اللي لازم تبقى عالية علشان تهضم الأكل و حموضة المريء .
سبب ارتجاع المريء بقى لما الصمام اللي ربنا عامله ده بيحصل فيه مشكلة بيرجع الحمض اللي في المعدة على النسيج المبطن للمريء و ياكل فيه لغاية ميعمل التهاب شديد و ممكن تقرحات و بنسبة ضئيلة جدا جدا ممكن الإلتهاب المزمن ده يعمل ورم في المريء لا قدر الله .
طب إيه اللي يخلي الصمام ده يبوظ و هو شغال زي الساعة كده .
أول حاجة الكرش 😁😁 آه حضرتك قريت صح كرشك هو سبب الارتجاع ، يعني لما تاكل نص بطة و حلة محشي و تحبس بلتر بيبسي و تروح تنام على بطنك متبقاش قادر تاخد نفسك يبقى طبيعي جدا ان الصمام يفرقع و يحلف 100 يمين ميعرفك تاني 😂😂 .
تاني سبب هو فتق الحجاب الحاحز و ده معناه ان الفتحة اللي بتعدي المريء من الصدر للبطن بتتمدد شوية فبتعدي جزء من المعدة كمان بتطلع في صدر المريض فطبعا بتسبب حموضة جامدة جدا جدا .
اللي زي الكرش هو أي حاجة تكبر حجم البطن و تزود الضغط جوا البطن زي مثلا الحمل في السيدات أو الإستسقاء عافاكم الله في مرضى تليف الكبد المتقدم
بعد كده ييجي الدور العظيم اللي بيقوم بيه التدخين بجميع أنواعه من زيادة حموضة المعدة و الارتجاع .
ممكن بعض الأدوية زي المسكنات القوية و بواسط العضلات تكون سبب في بعض الأحيان
طيب نيجي بقى للاعراض اللي بيشتكي منها المريض :
حموضة زائدة عند المريض خاصة في المساء و بعد الأكل بساعة تقريبا
و ممكن المريض يصحى من النوم على نوبة حرقان شديد و كتمة في النفس - بتبقى شديدة و شبه الأزمة القلبية على فكرة -
جفاف بالحلق
كحة مزمنة
آلام بالصدر زي آلام الأزمة القلبية
ممكن تسبب بحة أو تغير في نغمة الصوت لو استمر الموضوع لفترة طويلة
طيب بنشخص المرض ازاي : ببساطة بالأعراض و بأخذ التاريخ المرضي كويس و الاستماع الى شكواه جيدا
و اللي يقوللي منظار أقوله حرام عليك
لأن أغلب الحالات بتبقى بسيطة و بتحتاج علاج لفترة و تخف فمش معقول ييجي العيان قبل ما ياخد علاج على الأقل 3 شهور من غير ما تخف و أقوله يعمل منظار .
فيه طبعا فحوصات تانية كتير زي تحليل جرثومة المعدة مثلا و قياس حموضة المريء بس الحاجات دي بنخليها للحالات المتأخرة أو الغير مستجيبة للعلاج
طيب ايه العلاج يا دكتوووور صدعتنا
حااااضر حاضر .
العلاج أساسه المريض في كل المحاور
يعني ايه ؟؟ يعني عادات الأكل تتحسن
بلاش ياكل وجبات كبيرة و يقسم الأكل وجبات صغيرة
بلاش ناكل وجبات تقيلة بالليل
الأكل دايما يبقى صحي و مفيد بلاش لخبطة أبوس إيديكوا
إنقاص الوزن عند طريق اتباع حمية غذائية
المشي كل يوم نصف ساعة
الأدوية تتلخص في نوعين مهمين هما مضادات الهستامين و مضادات مضخات البروتون H2 BLOCKERS & PPIs
يا سلاااام على الطب بالعربي حاجة مذهلة 😁😁
في النهاية بتمنالكوا حياة صحية سعيدة من غير ارتجاع و لا كلام فاضي 😊😊😊
المصدر دكتور محمد الرزاقى
تم اضافة الموضوع بواسطة : Beso Mustafa
التحميل بصيغة ملف Word
التحميل بصيغة ملف PDF
تقييم الموضوع
شارك الموضوع