التهاب القولون التقرحى
صحة

التهاب القولون التقرحى

نبذه مختصرة عن الموضوع

الموضوع كاملاً

السلام عليكم و رحمة الله 

بعد غياب طويل و كما وعدناكم موضوع اليوم موضوع مهم جدا جدا جدا  و هو  " إلتهاب القولون التقرحي " 

اللي هيسألني يعني إيه يا دكتور إلتهاب القولون التقرحي هقوله خليك في جنب كده لو سمحت لما أفهمه أنا الأول أبقى أقهمك 😀😁 .

و دي حقيقة على فكرة مش هزار ولا حاجة لأنه زي ما انتوا  عارفين أن 90 % من أمراض الطب لا معروف سببها و لا حاجة و الأستاذ اللي فوق ده واحد منهم يعني . 

بس تعالوا بينا نفهم بالراحة كده بمقدمة بسيطة عن " إلتهاب القولون المزمن " . 

فاكرين لما كنا بتتكلم عن القولون العصبي و قلنا إنه عبارة عن خلل  " وظيفي " و حطينا تحتها 300 خط يعني القولون نفسه سليم مفيهوش أي حاجة و بنتأكد بتحاليل و فحوصات و أشعات عشان نحلف أنه سليم .

تفتكروا كل ده كان ليه ؟ . سفسطة يعني ولا  طويلة بال و لا ايه ؟  
علشان شوية حاجات كده بتتلخبط مع القولون العصبي منهم المرض الظريف اللي بتتكلم عنه ده . 

إلتهاب القولون المزمن ده و على عكس القولون العصبي بيبقى فيه مشكلة فعلا في القولون بتثبتها التحاليل و الفحوصات و الأشعات و المنظار القولوني و بيكون فيه المريض يعني فعلا من أعراض تصل في بعض الأحيان إلى حد الخطر و بيحتاج المريض للحجز في المستشفى لمدة تتراوح من أسبوع إلى أسبوعين على حسب الحالة . 

إلتهاب القولون المزمن ده بينقسم الى نوعين كبار و هم 

أولا مرض كرونز أو " CHROHN'S DISEASE
 
و ثانيا إلتهاب القولون التقرحي أو ULCERATIVE COLITIS  و ده بتاعنا النهاردة 

الفروقات ما بينهم كبيرة و كتيرة لكن أهم فرق أن كرونز ممكن بيجي في أي مكان في الجهاز الهضمي من أول الفم و حتى الشرج أما إلتهاب القولون التقرحي فهو مختص فقط بالقولون و ملوش دعوه بأي حاجة تانية - بيحب التخصص حضرته - 😂

كالعادة بالترتيب كده هنعرف : - 

ايه أسبابه : أقول لك حتى الآن محدش عارف ايه سببه و لكن بردو كلها نظريات ناس تقوللك جينات ناس تقول خلل مناعي ناس تقول وراثي كلها فرضيات و غالبا بيبقى كلهم على بعض كده 

الظريف في الموضوع أن فيه معلومة كده كنت ناوي اخبيها عنكم لكن الأمانة العلمية تحتم إني أذكرها و ربنا يسامحني و هي إن التدخين من الحاجات اللي بتقلل فرصة حدوث إلتهاب القولون التقرحي 😓 . 

طبعا فيه ناس بتقول هيييييييه و لولولولي و فرح و كده أقولك لا استنى و الله لأنكد عليك 😂

صحيح هيا بتقلل نسبة حدوث القولون التقرحي لكن بتزود نسبة مرض  كرونز  و أورام القولون و البنكرياس و أي بلوه تانية في الدنيا  فمتفرحش أوي يعني 😂😂 . 

طيب إيه هيا أعراضه : -

 أقوللك ده بيبقى على هيئة نوبات 
يعني إيه ؟ يعني فيه فترات بيبقى العيان فيها كويس و فترات بيبقى فيها تعبان و بيحس بارتفاع بدرجة الحرارة و هبوط شديد و إسهال و تعنية و وجود دم و مخاط بالبراز  و خسارة الوزن بشكل سريع و ممكن في بعض الحالات الشديدة يؤدي إلى الجفاف . و ليه كمان أعراض كتير خارج الجهاز الهضمي زي التهابات في المفاصل و إلتهاب القنوات المرارية و التهابات في العين و  حاجات كتير . 

بنشخصه ازاي المرض ده :- 

طبعا تشخيصه من أصعب الحاجات في الطب و مفيش تحليل واحد أو أشعة بعينها أقدر أعملها و أحلف بيها أن ده إلتهاب قولون مزمن سواء تفرحي أو كرونز و إنما بنشخصه بتضافر الحاجات دي كلها مع بعض يعني :- 

أخذ تاريخ مرضي مفصل من المريض 
يليه فحص إكلينيكي شامل  

الاتنين دول يخلوني أشك في أن المريض ده عنده إلتهاب قولون مزمن أقوم أدخل بقى على آليات تشخيصية أعلى و تحاليل مكلفة - حقيقة يعني - ثم أعمل بقى خطوة المنظار سواء مريء أو قولون على حسب أنا شاكك في إيه ؟ كرونز أو إلتهاب قولون تفرحي . 

و تخيلوا اني علشان أقدر اجزم لازم آخد بالمنظار  33 عينة على الأقل من القولون كامل مش من مكان واحد و تتحلل و في التحليل بقى هتلاقي بلاوي بعيد عنكوا إلتهاب أن بقى على دم على صديد ربنا يعافينا  و إياكم . 

طيب وصلنا للتشخيص نعالج بقى .  .   . لااااااااا أبسولوتلي انت فاكرها سهلة 

المريض ده من أكتر المرضى اللي بيعانوا طبيا لأنه فعليا بيفضل ماشي على علاج فترات طويلة جدا و ممكن يبقى مدى الحياة . 

العلاج بيتلخص في مضادات إلتهاب سواء بالفم أو لبوس شرجي و ده في المراحل الأولى و البسيطة .

الخط التاني هو الكورتيزونات و ما لها من أخطار و مشاكل و دي في الحالات الأكثر تطورا و بنبدأ في الأول بجرعات كبيرة و بعدين بنقللها تدريجيا . 

الخط الثالث هي مثبطات المناعة و دي علاجات قوية جدا و مشاكلها كتير لا يتسع المجال الحديث عنها .

الخط الأحدث في العلاج و هو العلاج البيولوجي  و ده علاج ناجح و فعال و لكنه له أيضا بعض الأضرار إلى جانب إنه مكلف جدا جدا . 

الخط الأخير و هو العلاج الجراحي و ده بنسيبه في الآخر لما يفشل العلاج الدوائي تماما .

طبعا اتفقنا أن العلاج بيستمر فترات طويلة و لازم نتابع المريض بمنظار قولوني و تحاليل مستمرة علشان نستبعد أن الالتهاب المزمن ده أدى لا قدر الله إلى أورام خبيثة بالقولون . 
 
في النهاية أدعوا الله أن يعافينا و إياكم  و أرجوا أن أكون قد وفقت في نقل صورة مبسطة عن مرض كبير بيتكتب فيه كتب حتى الآن . 
 
و الله من وراء القصد .

التعليقات

اترك تعليقاً